Ўзбекистон Нидерландияга 2:1 ҳисобида мағлуб бўлди
Нью-Йоркда бўлиб ўтган ўртоқлик учрашувида Нидерландия Коди Гакпонинг дубли эвазига ғалаба қозонди.
Ўзбекистон миллий терма жамоаси Жаҳон чемпионатига тайёргарлик доирасида ўтказилган ўртоқлик учрашувида Нидерландияга 2:1 ҳисобида мағлуб бўлди.
АҚШнинг New York City шаҳридаги “Icahn” стадионида бўлиб ўтган баҳснинг биринчи бўлими нидерландиялик футболчиларнинг устунлиги остида кечган. Учрашувнинг 31-дақиқасида ўзбекистонлик ҳимоячи Жаҳонгир Ўрозов жарима майдони ичида қоида бузган ва ҳакам пенальти белгилаган. 32-дақиқада Коди Гакпо ушбу имкониятдан унумли фойдаланиб, ҳисобни очган.
Иккинчи бўлимда Ўзбекистон терма жамоаси ўйин ташаббусини қўлга олишга ҳаракат қилган. Баҳснинг 86-дақиқасида Нидерландия футболчиларидан бири қўл билан ўйнагани учун майдондан четлатилган. Шундан сўнг ўзбекистонлик футболчилар сон жиҳатдан устунликка эга бўлган.
Учрашувнинг асосий вақтига қўшиб берилган дақиқаларда Ўзбекистон босимни кучайтирган ва 90+1-дақиқада Игорь Сергеев рақиб дарвозасини ишғол қилиб, ҳисобни тенглаштирган.
Бироқ баҳснинг сўнгги сонияларида яна пенальти белгиланган. 90+7-дақиқада Коди Гакпо иккинчи бор аниқ зарба йўллаб, дубль муаллифига айланган ва жамоасига ғалаба келтирган.
Шу тариқа, Ўзбекистон терма жамоаси Жаҳон чемпионати олдидан ўтказилган навбатдаги назорат учрашувини мағлубият билан якунлади.
Аввалроқ “оқ бўрилар” Канада терма жамоасига ҳам 2:0 ҳисобида имкониятни бой берган эди.
