Ўзбекистон Канадага 2:0 ҳисобида мағлуб бўлди

Жаҳон чемпионатига тайёргарлик жараёнини давом эттираётган Ўзбекистон миллий терма жамоаси Канада терма жамоасига қарши ўртоқлик учрашувида майдонга тушди. Эдмонтон шаҳридаги “Commonwealth” стадионида бўлиб ўтган баҳс мезбонларнинг 2:0 ҳисобидаги ғалабаси билан якунланди.

 

Учрашувнинг биринчи бўлими муросасиз курашлар остида ўтди. Ҳар икки жамоа ҳужумкор ўйин намойиш этишга ҳаракат қилган бўлса-да, танаффусга қадар ҳисоб очилмади. Баҳснинг 24-дақиқасида Ўзбекистон ярим ҳимоячиси Азиз Ғаниев жароҳат сабаб майдонни тарк этди ва унинг ўрнига Аббосбек Файзуллаев майдонга туширилди.

 

Иккинчи бўлимда Канада мураббийлар штаби таркибга бир қатор ўзгаришлар киритди. Ушбу қарор ўз самарасини бериб, 58-дақиқада Жонатан Осорио ҳисобни очди. Ўзбекистон футболчиларининг ҳужумдаги хатосидан сўнг ташкил этилган тезкор қарши ҳужум мезбонлар голига сабаб бўлди.

 

Учрашувнинг асосий вақти якунланаётган паллада Канада устунлигини мустаҳкамлади. Қўшиб берилган дақиқаларда Жейдон Нельсон жамоасининг иккинчи голини уриб, баҳсга якуний нуқтани қўйди.

 

Шу тариқа, Ўзбекистон миллий терма жамоаси Жаҳон чемпионати олдидан ўтказилган навбатдаги ўртоқлик учрашувини мағлубият билан якунлади.