Тошкентда аёл ҳайдовчини ҳақорат қилган эркак 15 суткага қамалди
Жабрланувчи аёлга ҳимоя ордери берилди.
Тошкент шаҳрининг Учтепа туманида икки ҳайдовчи ўртасида юзага келган жанжал ижтимоий тармоқларда муҳокамаларга сабаб бўлди. Воқеа акс этган видеода эркак ҳайдовчининг аёлни ҳақорат қилаётгани ҳамда унинг телефонини тортиб олишга урингани кўринган.
Пойтахт ИИББ маълум қилишича, ҳодиса 8 июнь куни Учтепа туманидаги Ҳақиқат кўчасида содир бўлган. 41 ёшли Nexia 3 ҳайдовчиси М.Ш. ва 34 ёшли Т.Ф. ўртасида йўл ҳаракати жараёнида келишмовчилик келиб чиққан. Шундан сўнг эркак ҳайдовчи жамоат жойида ҳақоратомуз сўзлар ишлатиб, жамиятда юриш-туриш қоидаларини қасддан бузган.
Ҳолат юзасидан М.Ш.га нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилган.
Жиноят ишлари бўйича туман суди қарорига кўра, ҳуқуқбузарга нисбатан 15 сутка муддатга маъмурий қамоқ жазоси тайинланган.
Суд жараёнида жабрланувчи аёл воқеадан сўнг руҳий босимни бошидан кечирганини билдирган. Шунингдек, унга ҳимоя ордери берилган.
Маълум қилинишича, судда сўзга чиққан эркак ҳайдовчи ўз қилмишидан пушаймонлигини билдириб, жабрланувчидан кечирим сўраган ва бундай ҳолат бошқа такрорланмаслигини айтган.
