Тошкентда ҳайдовчи бошқа ҳайдовчини таёқ билан урмоқчи бўлди
Ҳайдовчилар ўртасида юз берган можаро бўйича маъмурий иш қўзғатилиб, материаллар судга юборилди.
Тошкент шаҳрининг Яшнобод туманида икки нафар ҳайдовчи ўртасида юзага келган можаро акс этган видеолар ижтимоий тармоқларда кенг тарқалди.
Тошкент шаҳар ИИББ маълум қилишича, жорий йилнинг 12 июн куни Махтумқули кўчасида Cоbalt русумли автомашина ҳайдовчиси, 1992 йилда туғилган Д.Д. ҳамда Nexiа-3 русумли автомашина ҳайдовчиси, 1998 йилда туғилган Ш.А. йўл талашиш оқибатида ўзаро тортишиб қолган.
Можаро давомида ҳайдовчилар транспорт воситаларидан тушиб, йўлнинг қатнов қисмида жамоат тартибини бузган ҳолда ўзаро жанжаллашган. Тарқалган видеоларда улардан бирининг қўлига таёқ олгани ҳам акс этган.
Ҳолат юзасидан Яшнобод тумани Ички ишлар органлари ходимлари томонидан фуқароларга нисбатан Маъмурий жавобгарлик тўғрисидаги кодекснинг 183-моддаси — “Майда безорилик” аломатлари билан маъмурий баённома расмийлаштирилди.
Тўпланган материаллар қонунчиликда белгиланган тартибда кўриб чиқиш учун жиноят ишлари бўйича туман судига юборилган.
