Тошкентнинг айрим ҳудудларида электр таъминотида узилиш кузатилди
Узилишга “Юксак” подстанциясидаги носозлик сабаб бўлган ва натижада 110 кВ кучланишли иккита электр узатиш тармоғи фавқулодда ўчиб қолган.
28 июнь куни соат 20:45 да Тошкент шаҳридаги "Юксак" подстанциясида юзага келган носозлик сабаб пойтахт ва Тошкент вилоятининг айрим ҳудудларида электр таъминотида узилишлар кузатилди.
Энергетика вазирлиги маълумотига кўра, ҳодиса оқибатида Тошкент шаҳрининг Миробод, Чилонзор ва Яккасарой, шунингдек, Тошкент вилоятининг Зангиота туманларининг айрим ҳудудлари вақтинча электр энергиясисиз қолган.
"Тошкент shahar магистраль электр тармоқлари" корхонаси аниқлик киритишича, "Юксак" подстанциясидан чиқувчи Л-Ў-Ю 110 кВ 1 ва 2 электр узатиш тармоқларида ҳимоя тизими ишга тушиши оқибатида фавқулодда ўчиш содир бўлган. Натижада "Юртим" ва "Бунёдкор" подстанциялари тўлиқ кучланишсиз қолган. Шу сабабли Миробод, Яккасарой, Чилонзор ва Учтепа туманларининг айрим ҳудудларида электр таъминоти узилган.
Мутахассислар томонидан амалга оширилган тезкор қайта улаш ишлари натижасида 220/110/10 кВ кучланишли "Озодлик" подстанцияси орқали Чилонзор ва Учтепа туманларидаги истеъмолчиларнинг электр таъминоти босқичма-босқич тиклана бошлаган.
Ҳозирда махсус бригадалар носозлик сабабларини аниқлаш ва бартараф этиш, шунингдек, қолган истеъмолчиларни электр энергияси билан тўлиқ таъминлаш бўйича ишларни давом эттирмоқда.
