1 июлдан Ўзбекистонда касаллик нафақаларини тўлашнинг янги тартиби жорий этилади
Вақтинча меҳнатга лаёқатсизлик нафақалари дастлабки беш кун давомида иш берувчи, олтинчи кундан бошлаб эса Давлат ижтимоий суғурта жамғармаси маблағлари ҳисобидан молиялаштирилади.
Ижтимоий ҳимоя миллий агентлиги ҳамда Ижтимоий суғурта жамғармаси томонидан брифинг ўтказилди. Брифингда маълум қилинишича, 2026 йил 1 июлдан бошлаб жорий этиладиган янги тартиб доирасида болаларни парвариш қилиш бўйича қўшимча ижтимоий кафолатлар ҳам жорий этилади.
Хусусан, 14 ёшгача бўлган болани парвариш қилиш учун қўшимча 20 календарь кунгача, ногиронлиги бўлган 16 ёшгача болани парвариш қилиш учун эса қўшимча 40 календарь кунгача касаллик нафақаси тўланади.
Брифингда таъкидланишича, янги тизимнинг энг муҳим жиҳатларидан бири барча жараёнларнинг тўлиқ автоматлаштирилишидир. Эндиликда фуқаролардан касаллик нафақасини олиш учун ариза ёки қўшимча ҳужжатлар талаб этилмайди.
Электрон меҳнатга лаёқатсизлик варақаси расмийлаштирилиши билан тизим фуқаронинг расмий бандлиги, суғурта стажи ҳамда даромади ҳақидаги маълумотларни автоматик равишда текширади ва нафақани проактив тарзда тайинлайди.
Касаллик нафақалари “Барака” тизими орқали тўланади. Ҳар бир фуқаро учун виртуал карта автоматик равишда очилиб, маблағлар ушбу карта орқали ўтказилади.
Шунингдек, касаллик нафақаларини молиялаштириш муддатлари ҳам аниқ белгиланган. Ойнинг 1–15-саналари оралиғида тайинланган нафақалар шу ойнинг 25-санасига қадар, 16–31-саналари оралиғида тайинланган нафақалар эса кейинги ойнинг 10-санасигача фуқароларга тўлаб берилади.
Мутасаддиларнинг таъкидлашича, янги тартиб фуқаролар учун хизматларни соддалаштириш, нафақаларни ўз вақтида етказиш ҳамда давлат ижтимоий суғуртаси тизимининг самарадорлигини янада оширишга хизмат қилади.
