ЖЧ—2026:Англия 10 киши бўлиб ҳам Мексикани мағлуб этди
Чорак финалда Англия Бразилияни мусобақадан чиқариб юборган Норвегия билан куч синашади.
2026 йилги FIFА Жаҳон чемпионатининг 1/8 финалида Англия терма жамоаси Мексикани 3:2 ҳисобида мағлуб этиб, чорак финал йўлланмасини қўлга киритди.
Мехико шаҳридаги «Asteka» стадионида бўлиб ўтган учрашувда ҳисобни 36-дақиқада Жуд Беллингҳам очди. Орадан икки дақиқа ўтиб у дублни расмийлаштириб, Англиянинг устунлигини икки тўпга етказди.
42-дақиқада мексикалик Хулиан Кинёнес ҳисобдаги фарқни қисқартирди. Иккинчи бўлим бошида, 54-дақиқада англиялик ҳимоячи Жаррелл Куанса қизил карточка олиб майдонни тарк этди ва жамоаси ўйиннинг қолган қисмини бир киши кам бўлиб давом эттирди.
Шунга қарамай, 60-дақиқада Ҳарри Кейн пенальтидан гол уриб, ҳисобни 3:1 кўринишига олиб келди. Бу гол ҳужумчининг турнирдаги олтинчи голи бўлди. 69-дақиқада Раул Хименес ҳам пенальтидан аниқ зарба йўллаб, Мексиканинг иккинчи голини урди. Бироқ учрашув якунига қадар мезбонлар ҳисобни тенглаштира олмади.
Мазкур ғалабадан сўнг Англия чорак финалга йўл олди. Энди инглизлар ярим финал йўлланмаси учун Бразилияни мусобақадан чиқариб юборган Норвегия терма жамоасига қарши майдонга тушади.
