Венесуэладаги зилзилалар қурбонлари сони 3 500 нафардан ошди
Табиий офат оқибатида 16 740 киши жароҳатланди, қарийб 18 минг киши бошпанасиз қолди.
Венесуэлада июнь ойи охирида содир бўлган икки кучли зилзила оқибатида ҳалок бўлганлар сони 3 535 нафарга етди. Бу ҳақда мамлакат парламенти раиси Хорхе Родригес маълум қилди.
Унинг сўзларига кўра, табиий офат оқибатида 16 740 киши жароҳатланган, 18 мингга яқин фуқаро бошпанасиз қолган. Ҳозирда қидирув-қутқарув ишлари давом этмоқда ва қурбонлар сони яна ортиши мумкин.
БМТнинг дастлабки баҳоларига кўра, бедарак йўқолганлар сони 50 минг нафаргача етиши эҳтимолдан холи эмас. Венесуэла ҳукумати ҳозирча бедарак йўқолганлар бўйича расмий статистикани эълон қилмаган.
Эслатиб ўтамиз, 24 июнь куни мамлакат шимолида, пойтахт Каракас яқинида орадан атиги 39 сония ўтиб, магнитудаси 7,2 ва 7,5 бўлган кетма-кет икки зилзила содир бўлди. Мутахассислар ушбу ҳодисани Венесуэлада сўнгги 125 йил ичидаги энг кучли сейсмик офатлардан бири сифатида баҳоламоқда.
Табиий офатдан энг кўп Ла Гуайра штати зарар кўрди. Зилзилалардан кейин юзлаб афтершоклар қайд этилган. Расмий маълумотларга кўра, 60 мингга яқин бино вайрон бўлган ёки жиддий шикастланган.
Ҳукумат мамлакатда фавқулодда ҳолат ва мотам эълон қилган. Жабрланганларни жойлаштириш мақсадида Каракас ва Ла Гуайра ҳудудларида 80 та вақтинчалик бошпана ташкил этилиб, уларда 12 мингдан ортиқ фуқаро жойлаштирилган.
