Давлат рақамини яшириб ҳаракатланган "Матиз" ҳайдовчисига қонуний чора кўрилди
ЙҲХХ "Матиз" ҳайдовчиси ва ЙПХ ходими ўртасидаги тортишув юзасидан изоҳ берди.
Ижтимоий тармоқларда "Матиз" автомобили ҳайдовчиси ва йўл-патруль хизмати (ЙПХ) ходими ўртасидаги тортишув акс этган видео кенг муҳокамаларга сабаб бўлди. Ҳолат юзасидан Йўл ҳаракати хавфсизлиги хизмати (ЙҲХХ) расмий муносабат билдирди.
ЙҲХХ маълумотига кўра, видеода акс этган ҳайдовчи бундан аввал ҳам давлат рақам белгисининг бир қисмини ёпиб ҳаракатлангани учун айнан шу ЙПХ ходими томонидан огоҳлантирилган. Бироқ у қоидабузарликни такрорлаган.
Ҳайдовчининг ўзи ҳам аввал давлат рақам белгисининг бир қисмини скотч билан, кейинчалик эса қора материал билан ёпиб ҳаракатланганини тасдиқлади. Унинг айтишича, ижтимоий тармоққа жойлаган видеоси ҳиссиётга берилиб ёзилган бўлиб, ички ишлар органлари ходимларига нисбатан эътироз билдиришни мақсад қилмаган.
"Улар қонуний чора кўришди. Бу ишимиз нотўғри эканини билардим", деди ҳайдовчи.
ЙҲХХнинг билдиришича, ҳайдовчи огоҳлантирилганига қарамай қоидабузарликни такрор содир этгани сабабли унга нисбатан Маъмурий жавобгарлик тўғрисидаги кодекснинг 127-моддаси асосида маъмурий баённома расмийлаштирилган. Шунингдек, транспорт воситаси вақтинча сақлаш учун жарима майдонига жойлаштирилган.
Йўл ҳаракати хавфсизлиги хизмати ҳайдовчиларни йўл ҳаракати қоидаларига қатъий риоя қилишга, давлат рақам белгиларини яширган ҳолда транспорт воситасини бошқармасликка чақирди. Идора "Хавфсиз ва соғлом юрт" тезкор-профилактик тадбирлари давом этаётганини ҳам эслатди.
