Ўзбекистон ТИВда “Долзарб виза” ойлиги бошланди
Ойлик доирасида ўзбекистонликлар учун визасиз мамлакатлар сонини ошириш ва виза олиш тартибини соддалаштириш бўйича хорижий давлатлар билан музокаралар фаоллаштирилади.
Ўзбекистон Республикаси Президентининг “Ўзбекистон–2030” стратегиясида белгиланган вазифалар ижросини таъминлаш мақсадида Ташқи ишлар вазирлиги тизимида “Долзарб виза” ойлиги бошланди.
Вазирлик маълум қилишича, ойлик давомида Ўзбекистоннинг хориждаги дипломатик ваколатхоналари ва консуллик муассасалари хорижий ҳамкорлар билан музокараларни жадаллаштиради.
Бунда асосий эътибор Ўзбекистон фуқаролари учун визасиз сафар қилиш имкониятларини кенгайтириш, виза расмийлаштириш тартиб-таомилларини соддалаштириш ҳамда замонавий ва қулай виза механизмларини жорий этишга қаратилади.
Шунингдек, музокараларда визасиз режимни йўлга қўйиш, электрон визаларни жорий этиш, соддалаштирилган виза тартибларини кенгайтириш ва бошқа енгиллаштирилган механизмларни татбиқ этиш масалалари устувор йўналиш сифатида кўриб чиқилади.
Қайд этилишича, мазкур ташаббус Ўзбекистон фуқароларининг халқаро ҳаракатланиш имкониятларини кенгайтириш, хорижга сафар қилиш учун янада қулай шарт-шароитлар яратиш ҳамда мамлакатнинг очиқ ва фаол ташқи сиёсатини изчил амалга оширишга хизмат қилади.
