Угандада очликдан 19 киши вафот этди
Расмийлар яқин икки ой давомида 9 400 тонна озиқ-овқат ёрдамини аҳолига етказишни режалаштирмоқда.
Уганда ҳукумати мамлакат шарқидаги Караможа минтақасида очлик оқибатида камида 19 киши вафот этганидан сўнг фавқулодда озиқ-овқат тарқатишни бошлади.
Маълум қилинишича, узоқ давом этаётган қурғоқчилик туфайли Караможа минтақасида кутилган ёғингарчилик кузатилмаган, натижада ҳосил нобуд бўлган ва 1,5 миллионга яқин аҳоли кескин озиқ-овқат танқислиги ҳамда тўйиб овқатланмаслик муаммосига дуч келган.
Очликдан эрта огоҳлантириш тизимлари тармоғи (FEWS NET) минтақадаги вазият инқироз даражасига етганини қайд этган.
Расмийлар молиялаштиришдаги қийинчиликларга қарамай, яқин икки ой давомида 9 400 тонна озиқ-овқат ёрдамини аҳолига тарқатишни режалаштирмоқда. Бу ҳукумат томонидан ёрдам ҳажми қисқарганидан кейинги илк йирик гуманитар операция ҳисобланади.
Мутахассисларнинг таъкидлашича, Караможа сўнгги йиллардаги энг кучли қурғоқчиликлардан бирини бошдан кечирмоқда. Апрель ойидан буён сезиларли ёғингарчилик кузатилмагани сабабли фермерлар ҳосилдан деярли айрилган.
