B2 сертификатига эга бўлмаган хорижий тил ўқитувчилари ишдан бўшатилиши мумкин
Тегишли сертификатга эга бўлмаган хорижий тил ўқитувчилари билан меҳнат шартномасини бекор қилишни назарда тутувчи қарор лойиҳаси жамоатчилик муҳокамасига қўйилди.
Ўзбекистонда B2 даражадаги миллий ёки халқаро сертификатга эга бўлмаган хорижий тил ўқитувчилари билан тузилган меҳнат шартномасини бекор қилишни назарда тутувчи қарор лойиҳаси жамоатчилик муҳокамасига қўйилди.
Лойиҳага кўра, Вазирлар Маҳкамасининг 2021 йил 19 майдаги 312-сон қарорининг 9-бандига қўшимча норма киритилиши режалаштирилган. Унга асосан, умумий ўрта, ўрта махсус ҳамда профессионал таълим муассасаларида фаолият юритаётган, белгиланган малака талабига мос сертификатга эга бўлмаган хорижий тил ўқитувчилари билан меҳнат шартномаси меҳнат қонунчилигида белгиланган тартибда бекор қилиниши мумкин.
Қайд этилишича, амалдаги қарорда хорижий тил ўқитувчилари учун B2 даражадаги сертификат талаби мавжуд бўлсада, мазкур талабни бажармаган ходим билан меҳнат шартномасини бекор қилиш ёки уни ишдан четлаштириш бўйича аниқ ҳуқуқий асос назарда тутилмаган.
Мактабгача ва мактаб таълими вазирлиги ушбу ҳуқуқий бўшлиқни бартараф этиш мақсадида тегишли ўзгартиришларни таклиф қилмоқда. Аввалроқ, 2026 йил 13 январда вазирлик томонидан умумий ўрта таълим мактаблари ходимларининг малака тавсифларига ўзгартириш ва қўшимчалар киритиш тўғрисидаги буйруқ ҳам қабул қилинган.
Мазкур ҳужжат лойиҳаси 12 августга қадар жамоатчилик муҳокамасида бўлади.
