Трампга суиқасд таҳдиди: Оқ уй яқинида қуролланган эркак ҳибсга олинди
Унинг автомобилидан милтиқ, иккита тўппонча ва ўқ-дорилар топилган.
АҚШ Махфий хизмати 5 ноябрь куни кечқурун Оқ уй яқинида президент Дональд Трампга суиқасд қилиш билан таҳдид қилган Венесуэла фуқаросини қўлга олди. Бу ҳақда Fox News АҚШ Ички хавфсизлик вазирлигига таяниб хабар берди.
Қайд этилишича, гумонланувчи Конституция авенюсида тўхтаб турган, ўғирланган деб тахмин қилинаётган автомобиль ичида бўлган. Махфий хизмат агентлари унинг шубҳали хатти-ҳаракатларига эътибор қаратган.
Fox News маълумотига кўра, автомобилни кўздан кечириш давомида AR-15 русумдаги милтиқ, иккита тўппонча ва кўплаб ўқ-дорилар топилган.
Телеканал хабарида айтилишича, гумонланувчи 2024 йил март ойида Техас орқали АҚШга ноқонуний кирган ва Чегара патруль хизмати томонидан қўлга олинган. Бироқ кейинчалик Байден маъмурияти даврида озод қилинган.
Ҳозирда у АҚШ Маршал хизмати ҳибсхонасида сақланмоқда.
Махфий хизмат директори Шон Кёрран мазкур ҳодиса ҳимоя остидаги шахсларга нисбатан таҳдидлар ортиб бораётганини кўрсатишини билдирган. Унинг таъкидлашича, агентлик хавф туғдириши мумкин бўлган шахсларни улар пойтахтга етиб келишидан олдин аниқлаш ва таҳдидларнинг олдини олиш устида ишлашда давом этади.
