Ўзбекистонда об-ҳаво кескин ўзгаради: айрим ҳудудларда ҳарорат 7 даражагача совуқ бўлади
Айрим ҳудудларда кучли ёмғир ёғиши, шимолий ва тоғли жойларда эса қор кузатилиши мумкин.
9 ноябрдан Ўзбекистоннинг шимолий ҳудудларига, 10–12 ноябрь кунлари эса республиканинг қолган ҳудудларига совуқ ва нам ҳаво массалари кириб келади. Натижада мамлакат бўйлаб об-ҳаво кескин ўзгариши кутилмоқда.
“Ўзгидромет” маълумотига кўра, 9–11 ноябрь кунлари республиканинг катта қисмида ёмғир ёғади. Айрим жойларда ёғингарчилик кучли бўлиши мумкин. 10–11 ноябрь кунлари шимолий ва тоғли ҳудудларда ёмғир қорга айланади.
Шунингдек, айрим ҳудудларда шамол тезлиги секундига 13–18 метргача кучайиши кутилмоқда. Ҳаво ҳарорати 9 ноябрь куни шимолий ҳудудларда, 10–12 ноябрь кунлари эса республиканинг бошқа ҳудудларида аста-секин пасаяди.
Шимолий ҳудудлар ва чўл ҳудудларида кечаси ҳарорат 2–7 даража совуқ, кундузи 3–8 даража илиқ бўлади. Республиканинг қолган ҳудудларида эса кечаси 0–5 даража илиқ, айрим жойларда 1–2 даража совуқ, кундузи 7–12 даража илиқ бўлиши прогноз қилинмоқда.
