Тошкент аҳолиси учун янгилик: иситиш мавсуми бошланиш санаси белгиланди
Тошкент шаҳар ҳокимининг тегишли қарорига мувофиқ, 2026–2027 йилги иситиш мавсуми доирасида пойтахтда хонадонлар ва ижтимоий соҳа объектларига иссиқлик бериш босқичма-босқич бошланади.
Тошкент шаҳрида 2026–2027 йилги иситиш мавсуми 9 ноябрдан бошланади. Дастлаб ижтимоий соҳа объектлари ва кўп квартирали турар жой биноларига иссиқлик етказиб бериш йўлга қўйилади.
Пойтахт ҳокимининг тегишли қарорига мувофиқ, иситиш тизимлари мактаблар, боғчалар, шифохоналар ва бошқа ижтимоий муассасаларда ишга туширилади. Кўп квартирали уйларни иссиқлик билан таъминлаш ҳам шу санадан бошланади.
Иссиқлик таъминотига улаш ишлари босқичма-босқич амалга оширилади. Иситиш учун тўлов эса хонадонга иссиқлик амалда етказиб берила бошланган кундан ҳисобланади. Уланиш санаси бошқарув компанияси томонидан имзоланган икки томонлама далолатномада қайд этилади.
Хонадонларда иссиқлик бир маромда тақсимланмаса, фуқароларга уйга хизмат кўрсатувчи бошқарув компаниясига мурожаат қилиш тавсия этилади. Бино ичидаги иссиқлик тақсимоти ва ички тизимларнинг созлиги учун бошқарув ташкилоти масъул ҳисобланади.
Иссиқлик тармоқларида авария ҳолатлари юзага келганда, Veolia Energy Tashkent компаниясининг 1347 ёки (71) 200-00-56 рақамларига, шунингдек, @vet_pokazaniya_bot Тelegram-bot'ига мурожаат қилиш мумкин. Бот орқали мурожаатлар 24/7 режимида қабул қилинади.
