Қувада эркак оилавий можаро сабаб қайнотасининг уйига ўт қўйди
Ёнғин оқибатида хонадонга 109,8 миллион сўмлик зарар етган, судланувчи зарарни тўлиқ қоплагани инобатга олиниб, унга 3 йилга ахлоқ тузатиш ишлари жазоси тайинланди.
Фарғона вилояти Қува туманида эркак оилавий можаро сабаб қайнотасининг хонадонига ўт қўйган. Ҳодиса оқибатида 109,8 миллион сўмдан ортиқ зарар етказилган.
“Zamon” информацион дастурида маълум қилинишича, эркакнинг хотини фарзандини олиб, ота уйига кетган. Россиядан қайтган эркак фарзандини кўриш мақсадида қайнотасининг уйига борган. Бироқ у ерда қайнонасининг қизи бошқа кишига турмушга берилгани ҳақидаги гапдан жаҳли чиққан.
Орадан бир неча соат ўтиб, эркак қўлида бензин билан яна қайнотасининг хонадонига келган. У ёнилғини уйдаги хоналардан бирига сепиб, ўт қўйган ва воқеа жойидан кетган.
Ёнғин натижасида 109 миллион 884 минг сўмлик моддий зарар етказилган.
Суд мажлисида судланувчи айбига тўлиқ иқрор бўлган. У қилмишини жаҳл устида содир этганини билдириб, пушаймонлигини айтган. Жабрланувчи эса етказилган зарар тўлиқ қопланганини ва судланувчига нисбатан даъвоси йўқлигини маълум қилган.
Суд эркакни Жиноят кодексининг 173-моддаси иккинчи қисми “б” бандида назарда тутилган жиноятни содир этганликда айбли деб топган.
Етказилган зарар тўлиқ қоплангани ҳамда жабрланувчининг даъвоси йўқлиги инобатга олиниб, судланувчига 3 йил муддатга ахлоқ тузатиш ишлари жазоси тайинланган.
