Кичик тадбиркорлик субъектларини текширишга уч йилга мораторий жорий этилди

Ўзбекистонда кичик тадбиркорлик субъектлари фаолиятини текширишга уч йил муддатга мораторий жорий этилди.

 

Бу ҳақда “Ўзбекистон Республикаси Президентининг тадбиркорлар билан VI очиқ мулоқотида белгиланган вазифаларни амалга ошириш чора-тадбирлари тўғрисида”ги Президент фармонида (ПФ–175-сон, 2026 йил 27 август) белгиланган.

 

Ҳужжатга кўра, мораторий даврида кичик тадбиркорлик субъектлари фаолиятини ҳар қандай текшириш ноқонуний ҳисобланади. Бундай қонунбузарликка йўл қўйган мансабдор шахслар белгиланган тартибда жавобгарликка тортилади.

 

Мораторий айрим ҳолатларга татбиқ этилмайди. Жумладан, жиноят иши доирасидаги, инсон саломатлигига таъсирини ўрганиш ва меҳнат қонунчилигига риоя этилишини текшириш, фуқаролар мурожаатлари, қўшилган қиймат солиғини қоплаш (қайтариш), шунингдек, тадбиркорлик субъектини тугатиш билан боғлиқ текширувлар бундан мустасно.

 

Шунингдек, мораторий амал қиладиган даврда Бизнес-омбудсман томонидан “Самарали назорат” тадбири ўтказилади.

 

Тадбир доирасида назорат органларининг сўнгги уч йил давомида ўтказган текширувлари жойига чиққан ҳолда ўрганилади. Текширувлар давомида аниқланган қонунбузилишлар юзасидан тегишли чоралар кўрилади.

 

Текширув ўтказиш тартиби бузилгани ёки ноқонуний текширувлар аниқланган ҳолларда эса тадбиркорлик субъектларининг бузилган ҳуқуқларини тиклаш чоралари кўрилади.