31 август учун ўқитувчиларнинг иш ҳақидан пул ушлаб қолинмайди
Мактабгача ва мактаб таълими вазирлиги ижтимоий тармоқларда тарқалган хабарларга расмий муносабат билдирди.
Ўзбекистонда 31 август — дам олиш куни муносабати билан мактабларда ходимлар, жумладан, ўқитувчиларнинг иш ҳақидан пул ушлаб қолинмайди. Мактабгача ва мактаб таълими вазирлиги ахборот хизмати раҳбари ижтимоий тармоқларда тарқалган иш ҳақи тўловларига оид хабарлар юзасидан расмий муносабат билдирди.
Вазирликка кўра, амалдаги меҳнат қонунчилигида дам олиш куни муносабати билан, жумладан, 31 август учун мактаб ходимларининг иш ҳақидан ушлаб қолиш назарда тутилмаган. Шу сабабли иш ҳақини ушланмаларсиз, тўлиқ миқдорда тўлаш бўйича топшириқ берилган.
Шунингдек, мактаб ва мактабгача таълим ташкилотлари ходимларининг август ойининг иккинчи ярми учун иш ҳақи тўловлари 29 августдан бошлаб амалга оширилмоқда.
Қайд этилишича, мактабларда ходимларга иш ҳақи тўловлари штатлар жадвали ҳамда тарификация рўйхати бўйича ажратилган дарс соатлари асосида амалга оширилади.
Бунда ўқитувчиларга тарификация рўйхатида уларга белгиланган ойлик юклама, яъни ставкасидан келиб чиққан ҳолда иш ҳақи тўланади.
