Сергели ва Янгиҳаётдаги бадбўй ҳид муаммоси бартараф этилди

Тошкентнинг Сергели ва Янгиҳаёт туманларида аҳолини бир неча йилдан буён қийнаб келаётган бадбўй ҳид муаммоси бартараф этилди. Салор оқова сув тозалаш иншоотига нохуш ҳидни камайтириш учун 9,5 миллиард сўмлик замонавий фильтр ускунаси ўрнатилди.

 

Салор иншооти Тошкентнинг етти туманидан келадиган оқова сувларни қабул қилиб, тозалайди. Унинг суткалик қуввати 900 минг куб метрни ташкил этади. Нохуш ҳидни бартараф этиш мақсадида оқова сув ҳовузлари герметик ёпилган.

 

Ускунада ҳидли ҳаво вентилятор ёрдамида тортиб олиниб, филтрлар орқали тозаланади ва зарарсизлантирилади. Россиядан олиб келинган қурилмада 11,5 тонна каталитик сорбент ва 2,5 тонна фаоллаштирилган кўмир қўлланади. Ҳаво ультрабинафша нурлар ёрдамида озонлаштирилиб, оксидланиш жараёнидан ўтказилади.

 

“Тошкент шаҳар сув таъминоти” АЖ бош технологи Дўнонбой Казибековнинг маълум қилишича, Сергели, Янгиҳаёт, Миробод ва Яшнобод туманларидан келадиган оқова сувлар ушбу иншоотда тозаланади. Қурилма ишлаши натижасида чиқаётган ҳаводаги водород сульфиди ва аммиак концентрацияси нолга туширилган.

 

Ускуна 15 кундан ортиқ вақтдан бери ишламоқда. Қайд этилишича, унинг ишга туширилиши натижасида иншоот атрофидаги нохуш ҳидлар йўқолган. Буни яқин ҳудудларда яшовчи аҳоли ҳам тасдиқлаган.

 

4 июль куни Шавкат Мирзиёев раислигида ўтказилган йиғилишда Сергели ва Янгиҳаёт туманларидаги инфратузилма масалалари муҳокама қилинган. Унда сув тозалаш иншооти атрофидаги бадбўй ҳид аҳолини қийнаётган асосий муаммолардан бири экани қайд этилиб, 1 сентябргача оқова сув қабул қилиш иншоотига замонавий филтрлаш ускуналарини ўрнатиш топширилган.