Prezident Sergeli va Yangihayotdagi badbo‘y hid muammosini bartaraf etishni topshirdi

 

Prezident Shavkat Mirziyoyev raisligida Toshkent shahri, xususan, Sergeli tumanini ijtimoiy-iqtisodiy rivojlantirish va mahallalarda xavfsiz muhit yaratish masalalariga bag‘ishlangan videoselektor yig‘ilishida poytaxtning bir qator dolzarb muammolari muhokama qilindi.

 

Yig‘ilishda Sergeli va Yangihayot tumanlari aholisini uzoq yillardan buyon bezovta qilib kelayotgan oqova suvlarni tozalash inshooti atrofidagi badbo‘y hid masalasiga alohida e’tibor qaratildi. Mutasaddilarga 1-sentabrgacha oqova suv qabul qilish inshootiga zamonaviy filtrlash uskunalarini o‘rnatib, ushbu muammoni to‘liq bartaraf etish topshirildi.

 

Shuningdek, kelgusi yildan Birlashgan Arab Amirliklari hamkorlari bilan Quyi Chirchiq tumanida sutkasiga 300 ming kub metr oqova suvni qayta ishlash quvvatiga ega zamonaviy suv tozalash inshooti qurilishi boshlanishi ma’lum qilindi. Mazkur loyiha ishga tushirilishi natijasida Sergelidagi mavjud inshootga tushayotgan yuklama sezilarli darajada kamayadi.

 

Transport infratuzilmasini rivojlantirish doirasida joriy yilda Sergeli tumanining 23 kilometr asosiy yo‘llarida harakat xavfsizligi qayta ko‘rib chiqilishi belgilandi. Loyiha doirasida 455 ta “aqlli” svetofor o‘rnatiladi, 150 ta avtobus bekati yangilanadi hamda 10 ming o‘rinli avtoturargoh barpo etiladi.

 

Bundan tashqari, kelasi yilda Yangi Sergeli ko‘chasida 5,5 kilometrlik BRT (tezkor avtobus) yo‘lagi qurilishi rejalashtirilgan. Ushbu yo‘lak Shota Rustaveli ko‘chasi bilan bog‘lanib, jamoat transporti harakatini yanada samarali tashkil etishga xizmat qiladi.

 

Yig‘ilishda, shuningdek, Sergeli, Bektemir va Yangihayot tumanlarini poytaxtning boshqa hududlari bilan bog‘laydigan Toshkent halqa yo‘lidagi yangi ko‘prik qurilishini jadallashtirish zarurligi ta’kidlandi.