Тошкентда Словакияга ишга юбориш билан боғлиқ ноқонуний ҳолат фош этилди
Туристик фирма менежери хизмат эвазига фуқародан 3 минг доллар ва 2,5 млн сўм талаб қилган.
Ноқонуний миграцияга қарши курашиш йўналишида ДХХ Тошкент шаҳар бўйича бошқармаси ва Иқтисодий жиноятларга қарши курашиш департаменти ходимлари ҳамкорлигида Чилонзор туманида тезкор тадбир ўтказилди. Бу ҳақда ДХХ хабар берди.
Тадбир давомида маҳаллий туристик фирма менежери хорижга ишга юбориш фаолияти билан шуғулланиш ҳуқуқига эга бўлмаган ҳолда, Самарқанд вилоятида яшовчи фуқарони Словакияга ишга юбориш ва унга виза расмийлаштириб беришни ваъда қилгани аниқланган.
Бунинг эвазига у фуқародан 3 минг АҚШ доллари ва 2,5 млн сўм талаб қилган. Менежер талаб қилинган маблағнинг 1 минг АҚШ доллари ва 2,5 млн сўмини олаётган вақтида ашёвий далиллар билан ушланган.
Мазкур ҳолат юзасидан унга нисбатан жиноят иши қўзғатилиб, ҳозирда тергов ҳаракатлари олиб борилмоқда.
