Хоразмлик фуқаро 824 млн жаримага тортилгани айтилмоқда
МИБ ҳолат юзасидан Zamon.uz'га расмий муносабат билдирди.
Ижтимоий тармоқларда Хоразмлик тадбиркорга 824 млн сўм миқдорида солиқ жаримаси солингани ҳақида видео тарқалди. Мазкур ҳолат юзасидан Мажбурий ижро бюроси изоҳ берди.
Маълум қилинишича, фуқаро Б. Отаевнинг ижтимоий тармоқлардаги видеомурожаати ўрганилган.
Фуқаролик ишлари бўйича Урганч туманлараро судининг ҳал қилув қарорига кўра, “MAMATSAPO XAJARBIBI” оилавий корхонасининг қопланмаган солиқ қарзини корхона раҳбари Б. М. Отаевдан субсидиар тартибда, яъни корхона томонидан қопланмаган мажбуриятларни унинг шахсий мол-мулки ҳисобидан ундириш белгиланган.
Суд ҳужжатига асосан Хоразм вилояти солиқ бошқармаси фойдасига 792 948 384 сўм солиқ қарзи, 41 200 сўм почта харажати ҳамда давлат фойдасига 31 717 935 сўм давлат божи ундирилиши белгиланган.
МИБ маълумотига кўра, ушбу маблағлар солиқ органи томонидан тадбиркорга алоҳида жарима сифатида қўлланилган сумма эмас. Қарздорлик “MAMATSAPO XAJARBIBI” оилавий корхонаси томонидан ўз вақтида бажарилмаган солиқ мажбуриятлари натижасида юзага келган.
Мазкур қарздорликни тадбиркордан субсидиар тартибда ундириш эса қонуний кучга кирган суд қарори билан белгиланган.
Ижро ҳужжатлари 2026 йил 29 август куни МИБнинг тегишли бўлими иш юритувига келиб тушган.
Қарздорни ижро ҳужжатида белгиланган мажбуриятлардан хабардор қилиш ва уларни ихтиёрий равишда бажариш имкониятини таъминлаш мақсадида қонунчиликда белгиланган тартибда унинг телефон рақамига SMS-хабарномалар юборилган.
Айни вақтда мазкур ижро ҳужжати бўйича қонунчиликда белгиланган тартибда ижро ҳаракатлари давом эттирилмоқда.
