Ўзбекистонда битирувчилари энг юқори натижа кўрсатган топ-20 олийгоҳ аниқланди

Ўзбекистонда битирувчилар бандлиги, даромади, ишга жойлашиш тезлиги ва барқарор бандлик кўрсаткичлари таҳлил қилинди. “Битирувчилар сифати индекси” натижаларига кўра, энг юқори кўрсаткич қайд этган 20 та олий таълим муассасаси рўйхати эълон қилинди. Бу ҳақда Таълим сифатини таъминлаш миллий агентлиги ахборот хизмати хабар берди.

 

Қайд этилишича, топ-20 олийгоҳ тўрт тоифа — ижтимоий-гуманитар, амалий, тиббиёт, ижод ва спорт фанлари йўналишлари бўйича сараланган. Рўйхатдаги олийгоҳларнинг 11 таси ижтимоий-гуманитар, 5 таси амалий, 2 таси тиббиёт ҳамда 2 таси ижод ва спорт йўналишларига тегишли.

 

Йўналишлар бўйича энг юқори натижаларни қуйидаги олийгоҳлар қайд этган:

 

Ижод ва спорт фанлари:

 

• Ўзбекистон давлат консерваторияси — 81,5 балл;
• Ўзбекистон давлат консерваториясининг Нукус филиали — 79,6 балл.

 

Ижтимоий-гуманитар фанлар:

 

• Тошкент шаҳридаги Wеbster университети — 76,3 балл;
• Осиё халқаро университети — 73,4 балл;
• Халқаро Нордик университети — 72,1 балл.

 

Амалий фанлар:

 

• Тошкент шаҳридаги Инҳа университети — 74,2 балл;
• Навоий давлат кончилик ва технологиялар университети — 72,4 балл;
• Олмалиқ давлат техника институти — 69,1 балл.

 

Тиббиёт фанлари:

 

• Тошкент давлат тиббиёт университетининг Термиз филиали — 74,0 балл;
• Фарғона жамоат саломатлиги тиббиёт институти — 64,0 балл.

 

Умумий натижалар бўйича энг юқори кўрсаткич Ўзбекистон давлат консерваториясида қайд этилган — 81,5 балл.

 

Агентлик маълумотига кўра, “Битирувчилар сифати индекси” иш берувчилар учун олий таълим муассасалари битирувчиларининг тайёргарлик даражасини баҳолашда муҳим кўрсаткичлардан бири бўлиб хизмат қилади.