Газ баллонига яширилган 42 кг опий: Сурхондарёда наркотик моддалар савдоси фош этилди
Тезкор тадбир давомида наркотик моддаларни олиб кетиш учун келган икки киши ва уларнинг буюртмачиси ҳам қўлга олинди.
Сурхондарё вилоятида Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор тадбирда 41 кг 904 грамм опий мусодара қилинди. Наркотик моддалар билан боғлиқ ҳолат юзасидан тўрт нафар шахс ушланди.
Тезкор тадбир давомида Тошкент вилояти томондан келаётган, Денов туманида яшовчи, 1977 йилда туғилган шахс бошқарувидаги «Cobalt» русумли автомобиль тўхтатилиб, текширилди.
Текширув давомида автомобиль юкхонасига ўрнатилган газ баллони ичига 43 та ўрамга жойланган, жами 41 кг 904 грамм опий яширилгани аниқланди.
Тезкор тадбир давом эттирилиб, наркотик моддаларни олиб кетиш учун келган, 1960 ва 1983 йилларда туғилган, Денов ва Сариосиё туманларида яшовчи икки нафар фуқаро ушланди. Маълум қилинишича, уларнинг ҳар иккиси ҳам аввал гиёҳвандлик воситалари савдоси билан боғлиқ жиноятлар учун судланган.
Тадбирнинг кейинги босқичида наркотик моддалар буюртмачиси экани айтилган, 1978 йилда туғилган Сариосиё тумани фуқароси ҳам қўлга олинди. У ҳам муқаддам гиёҳвандлик воситалари савдоси билан боғлиқ жиноят учун судланган.
Ҳозирда мазкур ҳолат юзасидан тўрт нафар шахсга нисбатан жиноят иши қўзғатилган. Тергов ҳаракатлари олиб борилмоқда.
