13 ёшгача — тақиқ, ўсмирларга чеклов: Германия ижтимоий тармоқларни тартибга солмоқчи
Ҳукумат болаларнинг интернетдаги хавфсизлигини таъминлаш учун янги чораларни маъқуллади.
Германия ҳукумати болаларни интернетдаги хавфлардан ҳимоя қилишга қаратилган янги чораларни маъқуллади. Вазирлар Маҳкамаси чоршанба куни Европа Иттифоқининг тегишли қоидалари кучга киргунига қадар амал қилиши режалаштирилган ўтиш чораларини тасдиқлади.
Ташаббусга кўра, 13 ёшгача бўлган болаларнинг ижтимоий тармоқлардан фойдаланиши, хавфсизлиги исботланган платформалар бундан мустасно, чекланади. 13–18 ёшдаги ўсмирлар учун ҳам ёшига мос чекловлар жорий этилиши режалаштирилган.
Ҳукумат фойдаланувчиларнинг ёшини текшириш учун 2027 йилда махсус мобил иловани ишга туширишни кўзламоқда. Шунингдек, бошланғич синф ўқувчиларига сунъий интеллектдан фойдаланиш ва унинг хавфларини тушунишга ёрдам берадиган таълим дастури ишлаб чиқилади.
Ислоҳот доирасида ўсмирлар учун платформаларнинг тавсия алгоритмларига ҳам чекловлар қўйилиши, тавсиялар функцияси эса сукут бўйича ўчириб қўйилиши режалаштирилган.
Германия расмийларига кўра, бу чоралар болаларнинг рақамли муҳитда хавфсиз ривожланиши ва интернетдан мустақил фойдаланиш кўникмаларини шакллантиришга хизмат қилади.
Эслатиб ўтамиз, сентябрь ойида Европа комиссияси 15 ёшгача бўлган болаларнинг ижтимоий тармоқлардан фойдаланишини чеклашга қаратилган қонун лойиҳасини таклиф қилган эди.
