“Бизнинг ҳам тугалланмаган ишларимиз бор”: Эрон АҚШни огоҳлантирди

 

Эрон ташқи ишлар вазири Аббос Ароқчи АҚШнинг мамлакатга қарши янги ҳарбий амалиётлар ўтказиши мумкинлиги ҳақидаги таҳдидларига муносабат билдирди. У ижтимоий тармоқдаги постида Вашингтонни бундай қадамларнинг оқибатлари ҳақида огоҳлантирди.

 

“Охирги марта 'ишни тугатишниʼ хоҳлаганингизда, Эрон ўша қарама-қаршиликдан янада кучлироқ чиқди. Яна омадингизни синаб кўрмоқчимисиз? Марҳамат. Лекин эҳтиёт бўлинг: бизнинг ҳам тугалланмаган ишларимиз бор”, — деб ёзган Ароқчи.

 

Вазир, шунингдек, Исроил бош вазири Бенямин Нетаняхуни ўз сиёсий манфаатлари йўлида АҚШни яна бир урушга тортишга уринаётганликда айблаган. Унинг таъкидлашича, Нетаняху бундай йўл билан ўзига нисбатан ҳуқуқий оқибатлардан қочишга ҳаракат қилмоқда.

 

Ароқчининг баёноти АҚШ президенти Дональд Трамп Теҳрон ўз сиёсатини ўзгартирмаса, Вашингтон Эрон билан “ишни охиригача етказиши” мумкинлиги ҳақида огоҳлантирганидан кейин янграган. Трамп, шунингдек, Нетаняхунинг бош вазир лавозимига қайта сайланишини қўллаб-қувватлаган.

 

Сўнгги ҳафталарда АҚШ раҳбари Эронга қарши эҳтимолий ҳарбий ҳаракатлар ҳақида бир неча бор баёнот берган. Эроннинг энергетика инфратузилмаси ва ядровий объектларига зарба бериш эҳтимоли ҳам муҳокама қилинган. Трамп эса кейинчалик Эронга қарши ядро қуролидан фойдаланиш нияти йўқлигини билдирган.