Ўзбек киносига эътибор кучайди: бир йилда 218 миллиард сўм ажратилди
Президент миллий кино тарихида “Маҳаллада дув-дув гап”, “Ўтган кунлар”, “Шум бола” ва «Суюнчи» каби фильмлар алоҳида ўрин тутишини таъкидлади.
Президент Шавкат Мирзиёев «Ўзбекфильм» киностудиясида киноижодкорлар билан учрашув ўтказмоқда. Давлат раҳбари ушбу масканда миллий кино тарихи, бир неча авлод ижодкорларининг меҳнати ва халқнинг орзу-интилишлари мужассам эканини таъкидлади.
“Маҳаллада дув-дув гап”, “Ўтган кунлар”, “Шум бола”, “Чинор остидаги дуэль” ва «Суюнчи» каби фильмлар томошабинлар хотирасида алоҳида ўрин эгаллаган. Улардаги лавҳалар, иборалар ва куйлар кўпчиликка болалиги, бобо-бувилари ҳамда қадрдон маҳалласини эслатади.
Президент ўз давридаги сиёсий ва мафкуравий босимларга қарамай, ижодкорлар миллий санъатнинг нодир намуналарини яратишга муваффақ бўлганини таъкидлади.
«Ўзбекфильм» анъаналари мустақиллик йилларида ҳам давом эттирилди. «Абдуллажон», “Отамдан қолган далалар”, «Дилхирож», «Ватан» ва «Ўтов» каби томошабинларга манзур фильмлар суратга олинди.
Давлат раҳбари ўн йил аввал киностудия қандай аҳволда бўлганини ёдга олиб, ислоҳотларнинг дастлабки кунларидан бошлаб уни тиклаш ва киноижодкорлар учун муносиб шароит яратишга эътибор қаратилганини қайд этди. Киностудия тўлиқ реконструкция қилинди.
Сўнгги ўн йил ичида кино соҳасини қўллаб-қувватлашга қаратилган иккита фармон ва саккизта қарор қабул қилинди. 2016 йилда фильмлар суратга олиш учун давлат буджетидан 10 миллиард сўм ажратилган бўлса, жорий йилда бу кўрсаткич 218 миллиард сўмни ташкил этди.
Президентнинг таъкидлашича, амалга оширилган ишлар натижасида миллий фильмларнинг салмоғи ва сифати ошди, соҳага ўнлаб хусусий киностудиялар кириб келди.
