Юк машинасидаги яширин юк: Ўзбекистонга 20 кг дан ортиқ олиб кирилган опий фош этилди
Наркотик модда юк машинасининг махфий жойига ва иккита аккумулятор ичига яширилган.
Давлат хавфсизлик хизматининг Самарқанд вилояти бўйича бошқармаси ходимлари томонидан гиёҳвандлик воситаларининг ноқонуний айланмасига қарши ўтказилган тезкор-қидирув тадбирлари натижасида катта миқдордаги наркотик модда контрабандасига чек қўйилди.
Маълум қилинишича, Форс кўрфази мамлакатларидан бирининг 1971 йилда туғилган фуқароси шахси ҳозирда аниқлаштирилаётган қўшни давлат фуқароси билан тил бириктириб, ўзи бошқарувидаги «Renault» русумли юк автомашинасида гиёҳвандлик воситасини хориждан Ўзбекистонга олиб кирган.
Вилоят божхона ва ички ишлар бошқармалари билан ҳамкорликда ўтказилган тадбир давомида хорижлик фуқаро вақтинча яшаб турган Иштихон туманидаги уй кўздан кечирилган. Натижада соф оғирлиги 20 кг 239 грамм бўлган экстракцияланган опий аниқланиб, процессуал тартибда олиб қўйилган.
Қайд этилишича, наркотик модда юк автомашинасининг махфий жойига ҳамда иккита аккумулятор ичига яширилган ҳолда олиб келинган.
Ҳозирда хорижлик фуқаро ва бошқа шахсларга нисбатан Жиноят кодексининг 246 ва 273-моддалари билан жиноят иши қўзғатилган. Тергов ҳаракатлари доирасида мазкур ҳолатга алоқадор бошқа шахсларни аниқлаш чоралари кўрилмоқда.
