Университетга ўқишга киритиш ваъдаси: 18 млн сўм олаётган шахс қўлга тушди
У фуқарони университетнинг 3-курсига киритишни ваъда қилиб, пул талаб қилган.
Наманган шаҳрида фуқарони нодавлат олий таълим муассасасига ўқишга киритиб қўйишни ваъда қилиб, 18 миллион сўм талаб қилган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, гумонланувчи фуқарони Андижон иқтисодиёт ва педагогика университетининг 3-курсига ўқишга киритиб қўйишини айтиб, бунинг эвазига 18 миллион сўм сўраган.
Департаментнинг Наманган вилояти бошқармаси ва Наманган шаҳар бўлими ходимлари томонидан тезкор тадбир ўтказилган. Гумонланувчи келишилган пулни олаётган вақтида ашёвий далиллар билан ушланган.
Ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
