Кинематография агентлиги тугатилади: кино соҳаси Маданият вазирлигига ўтказилади

Ўзбекистонда кино соҳасини бошқариш, молиялаштириш ва фильм ишлаб чиқариш вазифалари ажратилиб, янги тизим жорий этилади. Кинематография агентлиги тугатилиб, кино соҳасидаги давлат сиёсатини юритиш ваколати Маданият вазирлигига ўтказилади.

 

Вазирликда Кино санъати департаменти ташкил этилади. Унинг раҳбари мақоми вазир ўринбосарига тенглаштирилади. Масъулларга бир ой муддатда департамент фаолиятини йўлга қўйиш, Кинематография агентлиги ва унинг тизимидаги ташкилотларни тугатиш топширилди.

 

“Ўзбекфильм” давлат муассасаси тугатилиб, замонавий бизнес модели асосида фаолият юритадиган янги “Ўзбекфильм” миллий кинокомпанияси ташкил этилади.

 

Янги компания миллий кино брендини ривожлантириш ва замонавий киноиндустрияни шакллантиришда таянч марказ ҳамда бош оператор вазифасини бажаради.

 

Кинокомпания бевосита фильм ишлаб чиқармайди. Фильмларни яратиш тўлиқ хусусий секторга ўтказилади. “Ўзбекфильм” эса кино лойиҳаларини танлаш ва молиялаштириш, фильмларни тарғиб қилиш, тарқатиш, шунингдек, уларни халқаро бозорлар ва фестивалларга олиб чиқиш билан шуғулланади.

 

Ушбу ўзгаришлар фильм ишлаб чиқаришдан тортиб, уни томошабинга етказишгача бўлган жараёнларни ягона тизимга бирлаштиришга қаратилган. Янги миллий кинокомпания фаолиятини бир ҳафта муддатда йўлга қўйиш топширилди. Киноларни молиялаштиришда давлат буюртмаси амалиётидан субсидия асосида қўллаб-қувватлаш тизимига ўтилади.

 

“Бундан буён давлат фильмнинг буюртмачиси эмас, ижодкорлар ва хусусий секторнинг ишончли ҳамкори бўлади”, — деди Президент.

 

Янги тизимда техник топшириқлардан кўра ижодий жараён ва унинг талабларига устуворлик берилади. Янги молиялаштириш механизмини бир ой муддатда жорий этиш вазифаси қўйилди.

 

Келгуси йилдан бошлаб ҳар йили “Ўзбекфильм” миллий кинокомпаниясининг сўровига кўра бюджетдан тегишли маблағ ажратиб борилади.