Мисрга сафар қилувчи ўзбекистонликлар учун енгиллик: янги кириш қоидалари кечиктирилди

Ўзбекистон фуқароларининг Мисрга киришига оид янги қоидаларни жорий этиш муддати 2027 йил 1 мартга қадар кечиктирилди. Бу ҳақда Ўзбекистон Ташқи ишлар вазирлиги маълум қилди.

 

Қайд этилишича, Ташқи ишлар вазирлиги ва Ўзбекистоннинг Қоҳирадаги элчихонаси-Миср-томони-билан-тўғридан-тўғри музокаралар олиб борган. Натижада Ўзбекистон фуқароларининг мамлакатга кириш тартибини қатъийлаштириш бўйича аввал қабул қилинган қарорни қайта кўриб чиқиш юзасидан келишувга эришилган.

 

Шу тариқа, янги қоидалар кучга киргунига қадар Ўзбекистон фуқаролари Мисрга амалдаги тартиб асосида сафар қилишлари мумкин.

 

Вазирлик хорижий ҳамкорлар билан фуқароларнинг чет элга сафар қилиш имкониятларини кенгайтириш, визасиз режимларни жорий этиш ва бошқа давлатлар билан мавжуд сафар тартиб-таомилларини соддалаштириш бўйича ишлар давом эттирилаётганини билдирди.

 

Шунингдек, фуқароларга хорижга сафар давомида маҳаллий қонунчилик ва белгиланган қоидаларга риоя қилиш, виза ҳамда миграция талабларини бажариш, борилаётган мамлакатнинг миллий қадриятлари, анъаналари ва жамоат тартибини ҳурмат қилиш тавсия этилди.

 

Аввалроқ 2026 йил 1 ноябрдан Ўзбекистон фуқароларининг Миср Араб Республикасига кириши бўйича янги тартиблар жорий этилиши, мамлакатга борувчи фуқаролар визани олдиндан расмийлаштириши ва айрим қўшимча талабларга риоя қилиши кераклиги ҳақида хабар берилганди.