Тадбиркорлар радарларига янги ваколат: камар тақмаган ҳайдовчилар ҳам аниқланади
Тадбиркорлар ўрнатган фото ва видео қайд этиш тизимларига хавфсизлик камаридан фойдаланиш қоидаларини бузиш ҳолатларини аниқлашга рухсат берилди.
Ҳукуматнинг 2026 йил 29 октябрдаги 596-сон қарори билан тадбиркорлар томонидан ўрнатилган махсус автоматлаштирилган фото ва видео қайд этиш воситалари орқали аниқланиши мумкин бўлган йўл ҳаракати қоидабузарликлари доираси кенгайтирилди.
Қарорга кўра, 2026 йил 1 ноябрдан бошлаб ушбу радарлар ҳайдовчиларнинг транспорт воситасини бошқариш ва йўловчилар ташишда хавфсизлик камаридан фойдаланиш қоидаларига риоя этмаслигини ҳам қайд этиши мумкин.
Бунинг учун фото ва видео қайд этиш тизимлари белгиланган умумий техник талабларга жавоб бериши керак. Жумладан, улар қоидабузарлик аниқланган сана ва вақт, содир этилган жойнинг аниқ координаталари, шунингдек, метрологик қиёслаш гувоҳномасининг рақами ва амал қилиш муддатини «Маъмурий амалиёт» модулига автоматик узатиш имкониятига эга бўлиши лозим.
Бундан ташқари, электр таъминотида узилиш юз берганда тизим камида 8 соат давомида ишлашини таъминлайдиган захира электр манбаи билан жиҳозланиши керак.
Хавфсизлик камаридан фойдаланмаслик ҳолатини қайд этишда юқори сифатли фотосуратларда ҳайдовчининг юзи ҳамда унинг хавфсизлик камарини таққан ёки тақмагани аниқ акс этиши шарт.
Қарор билан Вазирлар Маҳкамасининг 2021 йил 21 апрелдаги 232-сон қарорига тегишли ўзгартириш ва қўшимчалар киритилди.
