Тошкентда ноқулай метеорологик шароит: ҳаво сифати “носоғлом” даражада
Айрим кузатув нуқталарида ифлосланиш даражаси “жуда носоғлом” кўрсаткичга етди.
29 октябрдан 30 октябрга ўтар кечаси Тошкент шаҳрида ноқулай метеорологик шароитлар таъсирида атмосфера ҳавоси сифати ёмонлашди. Кечки соатларда Халқаро ҳаво сифати индекси (АQI) бўйича кўрсаткичлар, асосан, “сезгир гуруҳлар учун носоғлом”, ярим тундан кейин эса «носоғлом» даражада қайд этилди. Айрим кузатув нуқталарида “жуда носоғлом” кўрсаткичлар ҳам кузатилди.
Миллий ҳаво сифати индекси бўйича шаҳардаги ўртача PМ2.5 кўрсаткичи «сариқ», PМ10 эса “тўқ сариқ” даражада бўлди.
Ҳаво сифати ёмонлашишига ҳароратнинг пасайиши, шамолнинг жуда кучсизлиги ва кучли ҳарорат инверсияси сабаб бўлган. Бу омиллар атмосферанинг қуйи қатламларида ҳаво алмашинувини чеклаб, PМ заррачалари ҳамда маҳаллий чиқиндиларнинг ер юзасига яқин ҳудудда тўпланишига олиб келган.
Метеосат тасвирларига кўра, Тошкент шаҳри ва унинг атрофида сезиларли чанг ўчоқлари кузатилмаган. Шу сабабли ҳавонинг ифлосланиши, асосан, маҳаллий манбалар ва ноқулай метеорологик шароитлар таъсирида юзага келган.
Шунингдек, «Экологик мониторинг миллий маркази» давлат муассасаси мутахассислари Юнусобод, Олмазор, Мирзо Улуғбек, Шайхонтоҳур, Миробод ва Янгиҳаёт туманларида атмосфера ҳавосини инструментал ўлчовлардан ўтказди. Кузатувларда PМ2.5 кўрсаткичлари, асосан, «носоғлом» тоифага мос келган.
Прогнозларга кўра, 30 октябрь куни Тошкентда ҳаво сифати Халқаро АQI бўйича «носоғлом», миллий индекс бўйича эса, асосан, «сариқ» даражада бўлиши кутилмоқда.
Ҳозирда атмосфера ҳавоси сифати Махсус комиссия томонидан доимий мониторинг қилинмоқда.
