100 ва 200 минг сўмлик сохта купюралар: Ангренда қалбаки пул тайёрловчилар қўлга олинди
Ушбу шахслар муқаддам судланган бўлган.
Давлат хавфсизлик хизматининг Тошкент вилояти бўйича бошқармаси ходимлари вилоят ИИББ билан ҳамкорликда ўтказган тезкор тадбирда қалбаки пул тайёрлаш ва уни муомалага киритиш билан шуғулланган икки нафар шахсни қўлга олди.
Аниқланишича, Ангрен шаҳрида яшовчи, 1993 йилда туғилган фуқаро 1997 йилда туғилган таниши билан тил бириктириб, шаҳардаги кўп қаватли уйлардан бирида жойлашган хонадонни ижарага олган. Улар ушбу хонадонда қалбаки пул тайёрлаш билан шуғулланган.
Хонадонни кўздан кечириш жараёнида ярим тайёр ҳолатдаги 100 минг ва 200 минг сўмлик купюралардан иборат жами 79,8 млн сўмлик қалбаки пуллар аниқланиб, ашёвий далил сифатида олиб қўйилган. Шунингдек, «Эпсон» русумли рангли принтер, унинг бўёқлари ва канселярия жиҳозлари ҳам мусодара қилинган.
Қайд этилишича, ушбу шахслар муқаддам судланган бўлган.
Ҳолат юзасидан уларга нисбатан Жиноят кодексининг 176-моддаси 2-қисми «в» банди билан жиноят иши қўзғатилган. Ҳозирда тергов ҳаракатлари олиб борилмоқда.
