Тошкентда қозоғистонлик футбол фестивали иштирокчилари заҳарланди: 17 киши шифохонада

Тошкентда Қозоғистоннинг Қарағанди шаҳридан келган “Dostlik Cup 2026” халқаро футбол фестивали иштирокчилари орасида озиқ-овқатдан заҳарланиш ҳолати қайд этилди. Жабрланганларнинг 11 нафари бола, 6 нафари катта ёшли кишилардир.

Қозоғистоннинг Ўзбекистондаги элчихонаси маълум қилишича, 1 ноябрь куни фестиваль иштирокчилари — болалар ва катталар заҳарлангани ҳақида хабар келиб тушган. Жами 19 киши тиббий ёрдам сўраб мурожаат қилган, улардан 17 нафари Тошкент шаҳридаги 5-сонли шаҳар клиник инфекцион касалхонасига ётқизилган.

Жабрланганларнинг барчаси барқарор ҳолатда экани ва уларга зарур тиббий ёрдам кўрсатилаётгани билдирилган.

Элчихона консули Сакен Пердебеков хабар келиб тушганидан сўнг шифохонага бориб, жабрланганларга консуллик ёрдамини кўрсатган. Қозоғистоннинг Ўзбекистондаги элчиси ҳам шифохонага ташриф буюриб, даволаш жараёни билан танишган ва болаларнинг ота-оналари билан учрашган.

Вазият Қозоғистон соғлиқни сақлаш вазири Ақмарал Алназарова ҳамда Ўзбекистон соғлиқни сақлаш вазири ўринбосари Отабек Имомов назоратида экани маълум қилинган. Жабрланганларга ёрдам кўрсатиш учун Тошкент тиббиёт университети профессорлари, санитария-эпидемиология хизмати мутахассислари ва бошқа соҳа вакиллари жалб этилган.

Фестиваль ташкилотчилари ҳам жабрланганларга зарур ёрдам кўрсатмоқда.