Қозоғистонда давлат тўнтаришига уринишнинг олди олинди: 10 киши ушланди

 

Қозоғистон Миллий хавфсизлик қўмитаси (МХҚ) мамлакат ғарбида конституциявий тузум асосларини зўрлик билан ўзгартиришни режалаштирганликда гумонланган 10 кишини қўлга олди. Бу ҳақда идора матбуот хизмати хабар берди.

 

Маълум қилинишича, 30 октябрь куни Атирау шаҳрида прокуратура органлари мувофиқлаштируви остида ўтказилган тезкор тадбир давомида 10 киши бир вақтда қўлга олинган.

 

Улар экстремистик гуруҳ тузиш, унга раҳбарлик қилиш ва фаолиятида иштирок этиш, шунингдек, терроризмни тарғиб қилиш ҳамда диний адоват қўзғатишда гумон қилинмоқда. Тергов талқинига кўра, гуруҳ аъзолари Қозоғистоннинг ғарбий ҳудудида конституциявий тузум асосларини зўрлик билан ўзгартиришни мақсад қилган.

 

Гумонланувчиларнинг яшаш жойларида ўтказилган тинтувлар давомида ўқотар қуроллар, гиёҳванд моддалар, диний буюмлар, адабиётлар ва бошқа ашёвий далиллар олиб қўйилган.

 

Шунингдек, гуруҳ аъзолари томонидан болалар ва ўсмирлар учун ташкил этилган учта яширин ўқув маркази фаолиятига чек қўйилган. МХҚ маълумотига кўра, гуруҳнинг айрим аъзолари аввал ҳам террорчилик ва бошқа жиноий ҳуқуқбузарликлар учун судланган.

 

Қозоғистон МХҚси терговга оид бошқа маълумотлар ошкор этилмаслигини билдирган.