Журналистлар учун хавф ортмоқда: икки йилда 189 нафар ОАВ ходими ҳалок бўлди

 

ЮНEСКО маълумотларига кўра, 2024–2025 йилларда дунё бўйлаб касбий фаолияти билан боғлиқ ҳолда 189 нафар журналист ўлдирилган. Бу кўрсаткич 2022–2023 йилларга нисбатан 20 фоизга кўп.

 

Бу рақамлар ташкилот бош директори Холид Эл-Ананининг журналистлар хавфсизлиги ва уларга қарши жиноятлар учун жазосизликка қарши курашга бағишланган ҳисоботида келтирилган.

 

Ҳисоботга кўра, ҳалок бўлган журналистларнинг 127 нафари қуролли можаро ҳудудларида ўлдирилган. Уларнинг 40 фоизи дрон ҳужумлари оқибатида ҳаётдан кўз юмган. Журналистлар ўлими энг кўп Фаластинда — 62 нафар, Мексикада — 17 нафар ва Суданда — 14 нафар қайд этилган. Украинадаги можаро эса 12 нафар ОАВ ходимининг ҳаётига зомин бўлган.

 

Ҳисоботда маҳаллий ва халқаро уруш мухбирлари тобора кучайиб бораётган хавфларга дуч келаётгани қайд этилган. Хусусан, тўқнашувлар ва фронт чизиғидан узоқда амалга оширилган ҳужумлар журналистлар ҳаётига таҳдид солмоқда. Тўртта мамлакатдаги можаро ҳудудларида вақтинчалик медиа марказлари ва иш жойларига қилинган ҳужумларда 36 нафар журналист ҳалок бўлган. Шундай ҳолатлардан бирида бир ҳужумнинг ўзида тўққиз нафар журналист вафот этган.

 

ЮНEСКО сўнгги 20 йил ичида дунё бўйлаб 1 600 дан ортиқ журналистнинг ўлимини қайд этган. Бироқ ушбу жиноятлар бўйича терговлар атиги 14 фоиз ҳолатда якунланган.

 

Шу билан бирга, қуролли можаролар бўлмаган мамлакатларда журналистларга қарши жиноятлар бўйича тугалланмаган терговлар улуши 2012 йилдаги 94 фоиздан 2026 йилда 77 фоизга камайган.

 

“Матбуот эркинлигига содиқлик бугун ҳар қачонгидан ҳам долзарб. У можаро зоналарида ҳам, тинч ҳудудларда ҳам жиддий таҳдид остида қолмоқда ва журналистлар бунинг учун юқори нарх тўлашда давом этмоқда”, — деди ЮНEСКО бош директори Холид Эл-Анани.