10 йилгача қамоқ: Ўзбекистонда экстремизмга қарши кураш чоралари кучайтирилади

 

Ўзбекистонда экстремизмга қарши курашиш самарадорлигини ошириш мақсадида айрим қонун ҳужжатларига ўзгартириш ва қўшимчалар киритилди. Бу ҳақда Адлия вазирлиги маълум қилди.

 

2026 йил 2 ноябрдаги ЎРҚ–1185-сон қонун билан Жиноят кодексига киритилган қўшимчаларга кўра, экстремистик, сепаратистик, фундаменталистик ёки бошқа тақиқланган ташкилотларда иштирок этиш 5 йилдан 10 йилгача озодликдан маҳрум қилиш билан жазоланади.

 

Маъмурий жавобгарлик тўғрисидаги кодексга киритилган ўзгартиришларга кўра, экстремизм, сепаратизм ёки ақидапарастлик ғоялари билан йўғрилган, қирғин солишга, фуқароларни зўрлик билан кўчиришга даъват этадиган ёки аҳоли орасида ваҳима чиқаришга қаратилган материалларни тайёрлаш ёхуд тарқатиш мақсадида сақлаш учун жавобгарлик белгиланмоқда.

 

Шунингдек, экстремистик ва террорчилик ташкилотларининг атрибутлари ёки рамзий белгиларини тарқатиш ёхуд намойиш этиш мақсадида тайёрлаш ва сақлаш ҳам жазоланади.

 

Бундай ҳуқуқбузарликлар учун ҳуқуқбузарлик ашёсини мусодара қилган ҳолда:

• фуқароларга БҲМнинг 50 бараваридан 100 бараваригача;

• мансабдор шахсларга БҲМнинг 100 бараваридан 150 бараваригача жарима солиниши ёки 15 суткагача маъмурий қамоқ жазоси қўлланиши мумкин.

 

Бундан ташқари, қонун ҳужжатларидаги “диний экстремизм” ибораси «экстремизм» сўзи билан алмаштирилди.

 

Қонун расмий эълон қилинган кундан эътиборан кучга киради.