Самарқандда ШҲТ плюс илк экспертлар мулоқоти: хавфсизлик масалалари муҳокама қилинади
5–6 ноябрь кунлари Самарқандда рақамли трансформация даврида терроризм ва экстремизмга қарши курашиш масалаларига бағишланган халқаро экспертлар учрашуви бўлиб ўтади.
2026 йилнинг 5-6 ноябрь кунлари Самарқанд шаҳрида Хавфсизлик масалалари бўйича ШҲТ плюс биринчи экспертлар мулоқоти ўз ишини бошлайди.
Учрашув мавзуси – «Рақамли трансформация даврида хавфсизлик: янги технологиялар ривожланишини ҳисобга олган ҳолда терроризм ва экстремизмга қарши курашиш». Тадбир Ўзбекистон Республикаси Давлат хавфсизлик хизмати раҳбари генерал-полковник Б.Қурбонов раислигида бўлиб ўтади.
Мазкур форматни йўлга қўйиш ташаббуси Ўзбекистон Республикаси Президенти Ш.Мирзиёевга тегишли бўлиб, илк бор 2024 йилда ШҲТнинг Остона шаҳридаги саммитида янграган. 2025 йилда Тяньцзиньда бўлиб ўтган Ташкилотга аъзо давлатлар раҳбарлари кенгаши йиғилишида Хавфсизлик масалалари бўйича ШҲТ плюс биринчи экспертлар мулоқотини Самарқандда ўтказиш таклиф қилинган эди.
Бўлажак учрашувда ШҲТга аъзо давлатлар, кузатувчилар, мулоқот бўйича ҳамкорлар махсус хизматларининг раҳбарлари ҳамда вакиллари, халқаро ташкилотлар вакиллари, шунингдек, таклиф этилган меҳмонлар иштирок этади. Дунёнинг 24 давлатидан 33 та делегация ва 5 та халқаро ташкилот вакиллари келиши кутилмоқда.
Учрашув доирасида илғор технологиялар ва сунъий интеллектни замонавий таҳдид ва хавф-хатарларга таъсири хусусида фикр алмашилиши кўзда тутилган.
Музокаралар якуни бўйича делегациялар раҳбарлари рақамли трансформация даврида халқаро терроризм ва экстремизмга қарши курашиш бўйича ҳамкорликнинг аниқ вазифалари ҳамда устувор йўналишларини белгилаб оладилар.
