Янги технологиялар ва хавфсизлик: Самарқандда ШҲТ+ экспертларининг илк учрашуви ўтказилмоқда
Тадбирда аъзо давлатлар, кузатувчилар ва ҳамкор мамлакатлар махсус хизматлари вакиллари қатнашмоқда.
Самарқанд шаҳрида Хавфсизлик масалалари бўйича ШҲТ+ биринчи экспертлар мулоқоти ўз ишини бошлади. «Рақамли трансформация даврида хавфсизлик: янги технологиялар ривожланишини ҳисобга олган ҳолда терроризм ва экстремизмга қарши курашиш» мавзусидаги тадбир Ўзбекистон Республикаси Давлат хавфсизлик хизмати раиси, генерал-полковник Б. Қурбонов раислигида ўтказилмоқда.
Учрашув аввалида Президент Шавкат Мирзиёевнинг халқаро мулоқот иштирокчиларига йўллаган мурожаатини Президент ҳузуридаги Хавфсизлик кенгаши котиби В. Маҳмудов ўқиб эшиттирди.
Мазкур форматни ташкил этиш ташаббуси Ўзбекистон Президенти Шавкат Мирзиёев томонидан илгари сурилган. Бу таклиф илк бор 2024 йилда ШҲТнинг Остона шаҳрида ўтказилган саммитида билдирилган.
2025 йилда Тяньцзинда бўлиб ўтган ШҲТга аъзо давлатлар раҳбарлари кенгаши йиғилишида эса Хавфсизлик масалалари бўйича ШҲТ+ биринчи экспертлар мулоқотини Самарқандда ўтказиш таклиф қилинган эди.
Тадбирда ШҲТга аъзо давлатлар, кузатувчилар ва мулоқот бўйича ҳамкор мамлакатлар махсус хизматлари раҳбарлари ҳамда вакиллари, халқаро ташкилотлар вакиллари ва таклиф этилган меҳмонлар иштирок этмоқда.
