Тошкентда ҳаво сифати яхшиланди: “яшил” даража қайд этилди

Тошкентда 6 ноябрга ўтар кечаси ҳаво сифати ёмонлашганидан сўнг тонгги соатларда вазият яхшиланди. Миллий ҳаво сифати индекси бўйича пойтахтда ҳаво сифати “яшил” даражага етди.

 

Экология қўмитаси маълумотига кўра, 5 ноябрь куни соат 20:00 дан бошлаб халқаро ҳаво сифати индекси (АQI) бўйича Тошкент ҳавоси “носоғлом” даражага тушган. Ярим тундан кейин эса ҳаво сифати яхшиланиб, тонгда “ўртача” даражада қайд этилган. Миллий индекс бўйича кўрсаткич ярим тунгача “сариқ”, ундан кейин эса “яшил” даражада бўлган.

 

Қайд этилишича, кечки соатларда шамолнинг сустлиги маҳаллий ва қўшни ҳудудларда ҳосил бўлган атмосфера ташламалари ҳамда PМ заррачаларининг тарқалишига тўсқинлик қилган. Натижада ифлослантирувчи моддалар ер юзасига яқин қатламда тўпланиб қолган.

 

Ярим тундан кейин шарқдан илиқ ва қуруқ ҳаво кириб келиши, шамол тезлигининг ошиши ва ҳаво алмашинуви яхшиланиши натижасида PМ заррачалари тарқалган.

 

Экологик мониторинг миллий маркази мутахассислари Тошкент шаҳри ва Қибрай туманида ҳаво сифати бўйича инструментал ўлчовлар ҳам ўтказган.

 

Прогнозларга кўра, 6 ноябрь куни Тошкентда ҳаво сифати халқаро АQI бўйича асосан сезгир гуруҳлар учун носоғлом, миллий индекс бўйича эса асосан “яшил”, айрим вақтларда “сариқ” даражада бўлиши кутилмоқда.

 

Айни пайтда пойтахтда ҳаво сифатини яхшилашга қаратилган назорат ва рейд тадбирлари давом эттирилмоқда. Экология қўмитаси Экополицияси томонидан фуқаролар мурожаатлари асосида “Н.Ҳ.П” МЧЖ фаолияти ўрганилиб, корхонада экологик талаблар бузилгани аниқланган. 

 

Шунингдек, Тошкентдаги яна бир қурилиш объектида жиддий экологик қонунбузарликлар қайд этилган.