Зарарли APK-файллар ортидан 79 млрд сўм йўқотилди: Марказий банк огоҳлантирди
Ўзбекистонда киберфирибгарлик оқибатида фуқароларга 278,3 миллиард сўм зарар етказилган.

Йил бошидан 1 октябргача мамлакатда мобил қурилмаларга зарарли файлларни юклаб олиш ва ўрнатиш билан боғлиқ 18 830 та фирибгарлик ҳолати қайд этилган. Бу ҳақда Марказий банк маълум қилди.
Марказий банк Ички ишлар вазирлигининг Cardblock платформасида рўйхатга олинган фирибгарлик ҳолатлари юзасидан фуқароларнинг мурожаатларини таҳлил қилган. 2026 йил 1 январдан 1 октябргача бўлган давр натижаларига кўра, фирибгарликнинг бир нечта кенг тарқалган усуллари аниқланган.
Жумладан, фуқароларни телефон орқали кўрсатмалар бериб чалғитиш билан боғлиқ 611 та ҳолатда 27,7 миллиард сўм зарар етказилган. Telegram аккаунтларини эгаллаб олиш бўйича 2 808 та ҳолат қайд этилиб, 21,9 миллиард сўм маблағ йўқотилган.
Сохта савдо платформалари ва даромад ваъда қилувчи таклифлар орқали 1 044 та фирибгарлик содир этилган. Бунинг оқибатида 15,1 миллиард сўм зарар кўрилган. Понзи схемаларига пул киритиш билан боғлиқ 1 086 та ҳолатда эса зарар 14 миллиард сўмни ташкил этган.
Шунингдек, олдиндан тўлов қилинган товарлар етказиб берилмагани ёки хизматлар кўрсатилмагани юзасидан 3 571 та шикоят келиб тушган. Бу ҳолатларда фуқароларга 10,5 миллиард сўм зарар етказилган.
Фуқароларни кредитни бекор қилиш баҳонасида чалғитиб, уларнинг номига онлайн кредит расмийлаштириш билан боғлиқ 130 та ҳолат аниқланган. Етказилган зарар 10,6 миллиард сўмни ташкил этган. Онлайн ўйинлардаги тўловлар билан боғлиқ 272 та фирибгарлик ҳолатида эса 900 миллион сўм маблағ йўқотилган.
Бундан ташқари, банк карталари ва электрон ҳамёнлардан пул ечиб олиниши бўйича фирибгарлик тури кўрсатилмаган 11 475 та мурожаат қайд этилган. Улардаги зарар миқдори 98,1 миллиард сўмга тенг.
Марказий банк маълумотига кўра, кўриб чиқилган фирибгарлик ҳолатлари натижасида фуқароларга етказилган умумий зарар 278,3 миллиард сўмни ташкил этган. Тезкор чоралар натижасида 113,1 миллиард сўмлик маблағ блокланган.
Шу билан бирга, айрим фуқаролар банк карталаридан пул ечиб олинганини фирибгарлик деб ҳисоблаб, ҳуқуқни муҳофаза қилувчи органларга мурожаат қилган. Текширувларда маблағлар кредит қарздорлигини сўндириш учун автоматик ечиб олингани аниқланган. Бундай 2 737 та мурожаат қайд этилган бўлиб, улардаги маблағлар миқдори 7,6 миллиард сўмни ташкил этган.
Айни пайтда фирибгарлик ҳолатлари юзасидан ички ишлар органлари томонидан суриштирув ва тергов ишлари олиб борилмоқда.








