Пасха сулҳи якунланди: Россия ва Украина ўртасида дронлар ҳужуми бошланди
Украина мамлакатга учирилган 98 та дрондан 87 тасини йўқ қилган. Россия 33 та дронни тутиб қолган.
Пасха муносабати билан эълон қилинган сулҳ якунланганидан сўнг Россия ва Украина ўртасидаги ҳарбий ҳаракатлар яна кучайди. Бу ҳақда Deutsche Welle хабар берди.
Украина Қуролли Кучлари хабар беришича, 13-апрель куни маҳаллий вақт билан соат 00:10 дан бошлаб Россия қўшинлари мамлакатнинг шимолий ва шарқий ҳудудларига 98 та зарбдор дрон, асосан Shahed дронлари билан ҳужум уюштирган. Соат 08:00 га қадар ҳаво ҳужумидан мудофаа тизимлари 87 та дронни йўқ қилган, бироқ 10 та ҳудудда дрон зарбалари ёки уларнинг парчалари тушгани қайд этилган.
Черниговобленерго маълумотига кўра, Чернигов вилоятидаги энергетика обектига қилинган ҳужум оқибатида 12 мингдан ортиқ истеъмолчи электр таъминотисиз қолган. Херсон вилоятида эса портлашлар натижасида икки нафар фуқаро турли даражада жароҳат олган.
Россия томони ҳам дрон ҳужумлари қайд этилганини маълум қилди. Россия Мудофаа вазирлиги ҳисоботига кўра, ҳаво ҳужумидан мудофаа тизимлари Белгород, Курск, Ростов, Брянск, Смоленск вилоятлари ҳамда аннексия қилинган Қрим ҳудуди устида Украинага тегишли 33 та дронни тутиб олган ва йўқ қилган.
Белгород вилояти губернатори Вячеслав Гладков Грайворон шаҳридаги дрон ҳужуми оқибатида бир маҳаллий аёл ва “Орлан” бўлинмасининг бир ҳарбий хизматчиси жароҳат олганини билдирди. У жабрланганлар бир дрон ёки бир нечта алоҳида ҳужумлар натижасида яраланганига аниқлик киритмаган.
Аввалроқ Россия ва Украина етакчилари Пасха муносабати билан бир ярим кунлик сулҳга келишгани ҳақида хабар берилганди.
