Туркия авиакомпаниялари Москвага айрим рейсларни вақтинча бекор қилди
Бунга Внуково аэропортидаги вақтинчалик чекловлар сабаб бўлган.
Москвадаги Внуково аэропорти ҳаво ҳудудига киритилган вақтинчалик чекловлар сабаб Туркиянинг Pegasus Airlines ва Turkish Airlines авиакомпаниялари Москвага ва Москвадан амалга оширилиши режалаштирилган қатор рейсларни бекор қилди.
Маълумотларга кўра, чекловлар Москва вақти билан соат 02:45 дан 05:56 гача амал қилган. Шу сабабли Анталия, Измир, Истанбул, Бодрум ва Даламан аэропортларидан Москвага йўл олган айрим самолётлар парвозни давом эттира олмай, жўнаш аэропортларига қайтган.
Натижада Pegasus Airlines’нинг Москвадан Туркиянинг бир қатор курорт шаҳарларига амалга оширилиши режалаштирилган рейслари ҳам бекор қилинган. Turkish Airlines ҳам Истанбул–Москва йўналишидаги икки рейсни бекор қилган.
Йўловчиларга парвозлар қайта режалаштирилиши ҳақида маълум қилинган. Муқобил рейслар бўйича маълумотлар кейинроқ тақдим этилиши билдирилган.
Айрим йўловчилар эса сафарларини давом эттириш мақсадида бошқа рейсларга чипта олган. Улар қўшимча харажатлар, жумладан, меҳмонхонада тунаш билан боғлиқ сарф-харажатларни қоплаш масаласини кўриб чиқишни режалаштирмоқда.
