Украинага янги президент керак — Трамп
У Зеленскийни урушни тугатишга интилмаётганликда айблади.
АҚШ президенти Дональд Трамп Украина урушни якунлаш бўйича келишув туза оладиган янги етакчини сайлаши кераклигини айтди. У, шунингдек, Украина президенти Вoлoдимир Зеленскийни Россиянинг нефтни қайта ишлаш заводларига берилган зарбалар учун танқид қилди. Бу ҳақда BBC хабар берди.
«Мен Украинага келишув туза оладиган янги етакчини топишини таклиф қиламан. Зеленский кўплаб келишувларга эришиши мумкин эди, бироқ ундай қилмаяпти», — деди Трамп.
Қайд этилишича, АҚШ президенти Россия нефтни қайта ишлаш заводларига қилинган ҳужумлар дизель ёқилғиси нархининг ошишига таъсир қилганини таъкидлади. Шунингдек, у Зеленскийни урушни тугатишга интилмаётганликда билвосита айблаган.
Трамп Вашингтон Киевдан Россия нефтни қайта ишлаш заводларига ҳужумларни тўхтатишни сўраганини ҳам тасдиқлади.
«Биз Зеленскийга: 'Хоҳлаганингни қил, лекин дизель ёқилғиси ишлаб чиқариш объектларига зарба берма', дедик. У эса нима қиляпти? Бориб, айнан шу объектларга зарба беряпти. У истаган ишини қилиши мумкин, аммо буни эмас», — деди Трамп.
