Меҳмонхона ва савдо марказлари учун тўловлар камаяди: Янги Тошкентда янги тартиб

 

Президент Шавкат Мирзиёев Янги Тошкент қурилишига сармоядорларни кенг жалб этиш, уларнинг ташаббусларини қўллаб-қувватлаш ва лойиҳаларни амалга ошириш жараёнларини соддалаштириш зарурлигини таъкидлади.

 

Давлат раҳбари Янги Тошкентнинг мастер режаси мукаммал шаҳар барпо этиш учун ишлаб чиқилганини, бироқ у инвесторлар ташаббусига тўсқинлик қилмаслиги кераклигини қайд этди. Агар таклиф этилаётган лойиҳа шаҳар манфаатларига хизмат қилса, лот майдони ёки объект турини ўзгартириш бўйича ташаббуслар қўллаб-қувватланиши лозим.

 

Таъкидланишича, бундай ўзгаришлар учун ҳуқуқий имконият мавжуд. Бироқ таклифларни кўриб чиқиш тартиби мураккаб ва етарлича шаффоф эмас, айрим қарорлар эса ойлаб чўзилмоқда. Шу боис инвесторларнинг таклифларини аниқ мезонлар асосида тезкор кўриб чиқиш вазифаси қўйилди.

 

«Санкт-Петербург» мавзесига тадбиркорлар қизиқиши унинг концепцияси, лойиҳа ҳужжатлари ва қурилиш рухсати олдиндан тайёрланганлиги билан изоҳланади. Янги Тошкент дирекциясига шундай тайёр лойиҳалар сонини кўпайтириш топширилди.

 

Шунингдек, шаҳарнинг қиёфасини белгилайдиган йирик тижорат объектларини кўпайтириш зарурлиги таъкидланди. Ҳозиргача сотилган 54 та лотдан фақат учтасидаги лойиҳа қиймати 100 миллион доллардан ошади.

 

Шу мақсадда ер майдонларини очиқ ташаббус ва “Swiss challenge” тамойили асосида ажратиш амалиёти жорий этилади. Бунда ташаббус дастлаб очиқ эълон қилинади. Агар бошқа инвесторлар ундан яхшироқ шартларни таклиф этмаса, ер майдони биринчи ташаббускорга ажратилади.

 

Янги Тошкентда хизмат кўрсатиш ва ижтимоий объектлар қурилишини рағбатлантириш мақсадида инфратузилма тўловлари ҳам қайта кўриб чиқилади. Президент турар жой қуриш билан шаҳарга хизмат кўрсатадиган меҳмонхона ёки савдо марказини барпо этишнинг иқтисодий юки бир хил эмаслигини таъкидлади.

 

Янги тартибга кўра, инфратузилма тўловининг базавий ставкаси савдо, сервис ва бизнес марказлари учун 3 баробар, меҳмонхона ва туризм объектлари учун 5 баробар, маданий ҳамда кўнгилочар масканлар учун 10 баробар камайтирилади. Хусусий боғча, мактаб ва шифохоналар учун тўлов 1 фоиз этиб белгиланади. Ушбу тартиб қурилиши бошланган лойиҳаларга ҳам татбиқ этилади.

 

Бундан ташқари, дунёнинг етакчи архитекторлари ишлаб чиққан ўзига хос лойиҳалар учун тезкор тартиб жорий этилади. Лойиҳалаш, қурилиш ва объектларни фойдаланишга қабул қилиш жараёнлари жадаллаштирилиб, бир хил маълумотларни қайта-қайта талаб қилиш амалиётига чек қўйилади.