“50–100 йилдан кейин ҳам эсланадиган замин яратишимиз керак” — Президент

 

Президент Шавкат Мирзиёев Янги Тошкентни нафақат пойтахт, балки бутун мамлакат тадбиркорлари учун янги имкониятлар майдонига айлантириш зарурлигини таъкидлади.

 

Шу мақсадда пойтахтнинг ҳар бир туманига Янги Тошкентдан 100 гектардан ер майдони бириктирилди. Эндиликда туман ҳокимлари ўз ҳудудидаги тадбиркорлар билан ишлаб, янги лойиҳаларни ушбу майдонларга олиб келиши керак.

 

Худди шундай, мамлакатнинг қолган 13 та ҳудудига ҳам 100 гектардан ер ажратилади. Ушбу майдонларда амалга оширилган инвестициялар тегишли вилоят ёки Тошкент шаҳрининг туманлари кўрсаткичларида ҳисобга олинади.

 

Бириктирилган ҳудудлардаги ерлар бўйича ўтказиладиган биринчи аукционда фақат тегишли вилоят ёки туман тадбиркорлари иштирок этади.

 

Шунингдек, ҳар бир вилоят ҳокими ўз ҳудуди учун ишлаб чиқилган лойиҳа ва архитектура концепциясини Президентга тақдим этиб, тасдиқлатганидан сўнг қурилишни бошлайди. Вилоят ҳокимлари ҳар ой беш кун давомида Янги Тошкентда ишлаб, лойиҳалар амалга оширилишини ташкил этади.

 

Давлат раҳбари Янги Тошкент қурилиши мамлакат тарихида муҳим из қолдириши лозимлигини таъкидлаган.

 

“Бу Янги Ўзбекистон, бу тарих. 50 йил, 100 йилдан кейин одамлар «отасига раҳмат, ўша команда шундай замин яратиб кетган экан», деган фикрда бўлиши керак”, — деган Президент.