Сел ва фожиа: Қашқадарёда Damas оқизиб кетилиши оқибатида бир киши ҳалок бўлди
Қидирув-қутқарув ишлари давомида автомобилдаги йўловчининг жасади топилган.
Қашқадарё вилояти Деҳқонобод туманида кучли ёмғир сабаб юзага келган сел оқими Damas автомобилини оқизиб кетди. Ҳодиса оқибатида автомобилда бўлган йўловчи ҳалок бўлган. Бу ҳақда вилоят Фавқулодда вазиятлар бошқармаси матбуот хизмати хабар берди.
Маълум қилинишича, 13 октябрь куни соат 17:30 атрофида туманнинг тоғли ҳудудларида қисқа муддатли кучли ёмғир ёғган. Бунинг оқибатида Қўнғирот маҳалласидаги Шакарбулоқ қишлоғи ҳудудидан сел оқими ўтган.
Шу вақтда йўлдан адашган Damas ҳайдовчиси ва унинг ҳамроҳи йўналишни аниқлаш учун сел ўтадиган ҳудудда тўхтаган. Автомобиль сирпаниб, сел йўлининг чуқурроқ қисмига тушиб қолган.
Ҳайдовчи машинадан тушиб, телефон орқали боғланишга уринган ва ҳамроҳини сел келаётгани ҳақида огоҳлантирган. Бироқ сел оқими автомобиль ва унинг ичида қолган йўловчини оқизиб кетган.
Олиб борилган қидирув-қутқарув ишлари давомида йўловчининг жасади топилган. Ҳодиса жойига туман ҳокимлиги, Фавқулодда вазиятлар бўлими ҳамда Ички ишлар бўлими масъуллари жалб этилган.
