Одилхон Исмоилов иши: у уч йиллик синов муддати билан озод қилинди

Наманган вилоят судининг апелляция инстанцияси Одилхон Исмоиловга нисбатан тайинланган жазони шартли деб ҳисоблаш ҳақида қарор чиқарди. У суд залида қамоқдан озод қилинди. Бу ҳақда Наманган вилояти судлари ахборот хизмати хабар берди.

 

Жиноят ишлари бўйича Поп туман судининг 2026 йил 13 июлдаги ҳукми билан 1977 йилда Наманган вилоятида туғилган, «Райҳон оилавий миллий таомлари» таъсисчиси Одилхон Исмоилов озодликдан маҳрум қилиш жазосига ҳукм қилинган эди.

 

Ушбу жиноят иши Наманган вилоят судининг апелляция инстанциясида қайта кўриб чиқилди.

 

Суд иш доирасида етказилган зарарнинг бир қисми депозит ҳисоб рақамига нақд пул шаклида топширилганини, Исмоиловга тегишли айрим мулклар банк балансига ўтказилиши белгиланганини ҳамда хатланган мулкларни сотишдан тушган маблағлар зарарни қоплашга йўналтирилганини инобатга олди. 

 

Шунингдек, зарарни қоплаш учун унинг ўзи ва яқин қариндошларига тегишли мулклардан фойдаланилгани қайд этилди.

 

Апелляция суди Жиноят кодексининг 167-моддаси 3-қисми «а» банди бўйича тайинланган жазони ўзгаришсиз қолдирди. Бироқ Жиноят кодексининг 72-моддасига асосан, жазони уч йиллик синов муддати билан шартли деб ҳисоблаш белгиланди.

 

Шу тариқа, Одилхон Исмоилов суд залида қамоқдан озод қилинди.