25 минг долларлик келишув: Тошкент тумани ҳокими ўринбосари ушланди
У тадбиркорга 1 гектар ер майдонини аукцион орқали олиб бериш эвазига пул талаб қилган.
Тошкент вилоятининг Тошкент тумани ҳокими ўринбосари тадбиркорга қурилиш технологиялари ва композит эшиклар ишлаб чиқариш саноат мажмуасини ташкил этиш учун туман ҳокимлиги балансидаги 1 гектар ер майдонини аукцион савдоларига чиқариб, олиб беришни ваъда қилган. Бунинг учун у давлат активларини бошқариш тизимида ишловчи танишлари орқали ёрдам беришини айтиб, 25 минг доллар талаб қилган. Бу ҳақда Давлат хавфсизлик хизматининг Тошкент вилояти бўйича бошқармаси маълум қилди.
Ўтказилган тезкор тадбирда ҳоким ўринбосари сўралган пулни олаётган вақтида ашёвий далиллар билан ушланган.
Ҳолат юзасидан мансабдор шахсга нисбатан Жиноят кодексининг 168-моддаси 4-қисми «г» банди ҳамда 28, 211-моддаси 3-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
